Kreu i Grupit Parlamentar, Gazmend Bardhi ka reaguar pas daljes së Olsi Rames nga ambientet e SPAK-ut ku u mor në pyetje lidhur me çështjen Xibraka, për të cilën vëllai i kryeministrit është kallëzuar nga demokrati si i përfshirë.
Reagimi i tij vjen përmes një postimi në Facebook, teksa shkruan se aktrimi si “budalla” përpara derës së SPAK nuk është një strategji e duhur për vëllain e kryeministrit.
Bardhi e akuzoi Olsi Ramën për gënjeshtra, lidhur me përdorimin e makinës me targa AA653DM, për të cilën është kallëzuar vëllai i kryeministrit.
Siç shprehet demokrati, Rama e ka përdorur këtë makinë të paktën 7 herë, duke u bazuar sipas tij në të dhënat zyrtare të TIMS.
Postimi i Bardhit mbyllet me thirrje nga Prokurorisë së Posaçme që t’i shkojë deri në fund të së vërtetës lidhur me çështjen.
REAGIMI I KRYETARIT TË GRUPIT PARLAMENTAR TË PD, GAZMENT BARDHI
Të sillesh si budalla përpara derës së SPAK-u është një strategji e gabuar që nuk të shpëton nga e vërteta! Të thuash që ke përdorur makinën e trafikantëve të drogës, por trafikantët nuk i njeh, është një gënjeshtër banale.
Olsi Rama konfirmoi përpara derës së SPAK gjithçka kam denoncuar për të. Deklarimet e tij publike janë e vërteta më e madhe e kësaj çështjeje: “Një herë deklaroi se njeh njërin nga trafikantët, sot tha nuk njoh asnjërin. Një herë s’kam udhëtuar me narkomakinën, sot tha kam udhëtuar vetëm një herë”.
Por, sot vëllai i vogël i Edi Ramës gënjeu sërish publikisht kur tha se e ka përdorur vetëm njëherë narkomakinën AA 653 DM. Të dhënat zyrtare të sistemit TIMS dokumentojnë të kundërtën, se ai ka përdorur të paktën 7 herë narkoautomjetin AA 653 DM për daljet e tij jashtë vendit gjatë periudhës kur ndërtohej laboratori i drogës në Xibrakë.
Gënjeshtra e ditës dhe alibitë nuk janë as mjet mbrojtës dhe as zgjidhje. E vërteta ndodhet në procedimin penal 335/1-2016 që u tentua të varrosej nga prokuroria, por që sot mban numrin 88-2024! Inkurajoj SPAK t’i shkojë me guxim deri në fund të vërtetës, duke na provuar se në Shqipëri nuk ka persona të paprekshëm!
